محبوبتي بعـــيدة

الخميس يوليو 17, 2014 6:54 am

محبوبتي بعـــيدة

نَعْــطي رْمُـــوزْ للمَحبُوبَة وسْمَـاهَا *** والوالْعِــــينْ مَا يَثْنِــيْهُمْ مطْــــلُوبْ

قَــــبْلْ الكــــلامْ رُدْ الكَلمَة لَجْــوَاهَا *** فالوادْ يَا بْنِي مَا يَعْشَرْشْ الطُــوبْ

ستَين60 شَـاوْهَا والسبعين70 وْرَاهَا *** عَشْرَة 10 مْوَالْيَة والربْعَة4 مَنْصُوبْ

النَاسْ كُلْ حَــبَّتْ تَشْرُبْ مَنْ مَــاهَا *** وَانَا فْ دَارْ حُـــبِّيْ مَالِيْ مَحْــبُوبْ

السين ســـر من عــــند الله عطاها *** والعين دايـرة دون العــين حجوب

اليا حوات ريــح الـﭬصبة وغنــاها *** والدال شـــاهدة للكــاس المدْعُوبْ

يَا دَاخْــلَ المْــدِيْنَة سَــلَّمْ لَثْــــرَاهَا *** ساسي العَـافْيَة لا تُغْــدَى مَعْطُوبْ

طرْشُونْ في وْكَرْهَا بَايَتْ عَسَّاسْ

يَا دَاخــــلْ المْـدينة سَــلَمْ تَسْــــلَمْ *** الضَنْ في الحْـبيبة رامي قَيَّــاسْ

أرض النْقَــــارْ نَاقَــــرْ كَانْ تْنَجَّــــمْ *** وَلَّا خْطِيْكْ رَيَّحْ مَنْ وَجْـــعْ الرَاسْ

فُرْسَانْ رَاكْـــبِينْ خْيُــــــولْ تْهَضْلَمْ *** مَنْ حَسْهَا تْخَافْ يْجِيْكْ الوَسْوَاسْ

مَهْمَا تبَانْ مَهْمَا شَــــــــانَكْ يَعْظَمْ*** تَبْقَى قْبَــالْهَا قطرة وَسْـط الكَـاسْ

فيها اللي يْجيبْ خْبَارَكْ مَنْ ثَــمْ *** وَيْحَوْطُوا عْـــلِيكْ صوار الدَرْيَاسْ

دُرْكْ البْــــلَى لْسَـــــانَكْ يَا بُونَـــادَمْ *** كِيْمَا تْقِـــيسْ خَـــيَّك لازَمْ تَتْقَـــاسْ

خُوذْ الكْـلامْ يَا سَامَعْنِيْ وفْهــمْ *** مَا رَاحْ لِيكْ رايَح في عَيبْ النَاسْ

وَانَا اللي عْلِـــيهْ عْــــوَاميْ نَنْضَمْ *** مَا قَـالّيْ حْوَالْ خْبَـــــارَكْ لا بَـاسْ

مَاذَا تْعَـــدّْ يَا رَاجَلْ فَاضْ الكَـــاسْ

محبوبتي عْلَى السَعْدْ هْلِيْ سْماوْها *** والسَعْدْ في سْعِيْدَة خـــالف لغراس

فِيهَا لْقِـيتْ جَـــنَّة وَنْجُومْ ضْوَاوْهَا *** رَوْضة مْشَهْرَة في حُـــلَّة وُلْبــاسْ

الفُـلْ والقْرُنْفُلْ في الارضْ كْسَاوْهَا *** والياسْمين والنَسْـرينْ مْعَ اليَــاسْ

وَطْيُورْ في غْصَانْ تْلاغُوا زَهَّاوْهَا *** يَحْيُو حْسَاسْ فاللي ما ليه حْسَاسْ

إذَا وْصَفْتْ وَصْفي ما يِبْـلَغْ شَاوْهَا *** في ساحل الحْــبِيْبَة ضاعْ المَقْيَاسْ

معْشُوقْتي انطــربت للي عــادَاوْهَا *** وَهْدَاتْــني انْلاجِي فـــيدْ النَّخَّـــاسْ

مَكْمُــــولَة البْهَى حُسَّـــادْ تْبَنَّــاوْهَا *** وعْـﭭابْهَا تْمَــــلَّكْ كِي وَلَّـــــى رَاسْ

مَهْــــما نْسَـــاتْنَا والله مَا نَنْسَـاوهَا *** حَرْمْ الحْبِيْبْ مَا نَرْضَـولُو يَنْقَــاسْ

مَاذَا تْعَـــدّْ يَا رَاجَلْ فَاضْ الكُـــوبْ

محــبوبتي سْمَـاهَا ذكرُو يَسْعَـــدْ *** وَصْبَاحْهَا يْفُــكْ خْــبَال المكْــروب

مكْروب في هْـواهَا رَاني وَاقَـــدْ *** والشوك حـال بيني بين المرغوب

مرغوب خَاطْر قَصْدِي والمرْصَدْ *** نَصْفى الجـــافية في بَهْرَاج الثوب

الثـوب فِيْ بْعَــادَكْ عَــادْ يْـبَـــرَّدْ *** والـﭬلب فـوقْ نَــارَكْ ما زال يْذوبْ

يْذوبْ مَنْ دْخَـلْ سَـاعَة للمَصْهَدْ *** وَانَا سْنِينْ فُــوقْ جْمَارَكْ مَجْـدُوبْ

مَجْـــدُوبْ للحْبْيبَة نَبْـقَى نَنْشَـــدْ *** مَهَمَا انْزَلْتْ تَبْقَـــالِيْ عَـــزْ رْكوبْ

عمر زيعر /بن علال